భూమ్మీదనే 30 శాతం జీవులను మనం చూడలేదు. దట్టమైన అడవుల్లో, గుహల్లో లక్షలయేళ్ళుగా అవి జీవనం సాగిస్తున్నాయి. ఇప్పటికీ మనం చూడలేని, మనకు తెలియని వృక్షజాతులు కూడా ఉన్నాయి. భూమ్మీదనే ఇలాఉంటే , సముద్రగర్భంలోని జలచరాలు సంగతి చెప్పవవసరమే లేదు. సముద్రగర్భంలో ఇప్పటికీ 40 శాతం జీవులను మనం చూడలేదు. అరుదైన జీవులకు సముద్రం ఆలవాలం.
అలాంటివాటిలో ఇదిగో, ఈ ఎర్రపెదాల గబ్బిలం చేప ఒకటి. సముద్రగర్భంలోనే ఉండే ఈ విచిత్ర జీవి నీటిపైకి రాదు. ఎందుకంటే అది ఈదలేదు. దానికి రెక్కలు ఉన్నప్పటికీ , ఈ రెక్కలతో ఈదలేదు. ఆ రెక్కలని కాళ్ళుగా చేసుకొని సముద్రం అడుగుభాగంలో నడుస్తుంది. దానిపెదాలు లిప్ స్టిక్ వేసుకున్నట్టుగా ఉంటాయి. చేప ఆకారం కూడా గబ్బిలాన్ని పోలిఉంటుంది.
ఈ చేప జీవిత కాలం 12 సంవత్సరాలు. దీనిని ఆహారంగా తీసుకున్న సందర్భాలు లేవు. గాలాపగోస్ దీవులలో ఈక్వెడార్ పరిదిలో సముద్రంలో 76 మీటర్ల లోతులో లేదా సముద్రం అడుగుభాగంలో ఈ చేపలు ఉంటాయి. కోస్టారికాలోని పసిఫిక్ తీరంలో కోకోస్ ద్వీపం సమీపంలో కనిపించే ఈ చేపలు చనిపోతే తప్ప ఒడ్డుకు రావు. ఈ చేపలు 40 సెంటీమీటర్ల వరకు పెరుగుతాయి. ఆడ చేప గుడ్లు పెట్టిన అవి జిగురుగా ఉండి , కింద రాళ్లకు, నాచుకి అతుక్కుని ఉంటాయి. తరువాత మగచేప వాటిని పొదిగేవరకు కాపాడుతుంది.
